Irani ka nisur ceremonitë mortore për ish-Udhëheqësin Suprem, Ali Khamenei, me një procesion të madh funeral në rrugët e Teheranit, ku mijëra qytetarë u mblodhën për t’i dhënë lamtumirën. Autoritetet kanë mbyllur rrugë, hapësirën ajrore dhe kanë kufizuar aktivitetin e përditshëm gjatë ceremonive, të cilat do të zgjasin deri të enjten, kur Khamenei do të varroset në faltoren e Imam Rezas në Mashhad, qyteti i tij i lindjes.
Arkivoli i Khameneit u transportua me një kamion të dekoruar me motive tradicionale fetare, ndërsa përgjatë itinerarit u dëgjuan thirrje si “Vdekje Amerikës” dhe “Vdekje Izraelit”. Në turmë, disa pjesëmarrës shpërthyen në lot, ndërsa të tjerë kërkuan hakmarrje ndaj presidentit aktual amerikan, Donald Trump.
Pamje të publikuara nga Reuters treguan edhe një kukull që paraqiste Trumpin të varur, ndërsa flamujt e Republikës Islamike dhe pankarta me thirrje për hakmarrje shoqëronin procesionin.
Përkrah arkivolit të Khameneit ndodheshin edhe arkivolet e disa anëtarëve të familjes së tij, të cilët humbën jetën në sulmin ajror të 28 shkurtit, sulm që i dha fund sundimit gati katërdekadësh të liderit iranian dhe që shënoi nisjen e luftës mes Iranit, SHBA-së dhe Izraelit.
Fotografi të Khameneit janë vendosur në shumë zona të kryeqytetit iranian. Në disa prej tyre ai shfaqet me djalin e tij, Mojtaba Khamenei, i cili është emëruar Udhëheqësi i ri Suprem i Iranit, por që ende nuk është shfaqur publikisht dhe nuk ka bërë asnjë deklaratë që nga fillimi i luftës.
