Presidenti i SHBA-së, Donald Trump, ka ironizuar sërish përmes një meme-je kryeministren italiane Giorgia Meloni, duke rikthyer vëmendjen te tensionet mes tyre. Në një postim në platformën Truth Social të dielën, ai ndau një imazh ku Meloni shihej duke e parë me një shprehje admirimi, i shoqëruar me mbishkrimin: “Nevojitet urdhër kufizues”. Megjithatë, sipas raportimeve, kjo shaka nuk është krijuar nga vetë Trump.
Sipas të përditshmes Corriere della Sera, qeveria italiane nuk pritet të reagojë ndaj këtij provokimi. Ndërkohë, të dy liderët do të takohen këtë javë në Ankara, në kuadër të një samiti të NATO-s.
Më herët, Meloni kishte hedhur poshtë pretendimet e Trump se ajo kishte kërkuar me ngulm një foto me të gjatë samitit të G7 në Francë, duke theksuar se paraqitja e tepërt e afërsisë me presidentin amerikan mund të ndikojë negativisht në popullaritetin e një politikani.
Raportet mes dy liderëve janë ftohur edhe më tej pas mosmarrëveshjeve për qëndrimin e Italisë ndaj luftës SHBA–Izrael–Iran, si dhe pas kritikave të Melonit ndaj deklaratave të Trump për Papa Leonin XIV, të cilin ai e kishte cilësuar si “të dobët ndaj krimit” dhe “mosmirënjohës”.
