Kryetari i Partisë Demokratike, Sali Berisha, pas mbërritjes nga Brukseli iu bashkua sot protestës së opozitës, ku mbajti një fjalim të shkurtër ku akuzoi për manipulim të zgjedhjeve dhe lidhje me krimin e organizuar.
Berisha tha se ka paraqitur para Bashkimit Demokrat Ndërkombëtar, një organizatë me mbi 87 parti të qendrës së djathtë nga e gjithë bota, “masakrën elektorale të Toto Rinos së Ballkanit, Edi Rama”.
“I njoha me shkeljet monstruoze. Bindja e të gjithëve ishte se karrigia e Edi Ramës qëndron mbi krimin monstruoz të grabitjes dhe plaçkitjes së zgjedhjeve të qytetarëve shqiptarë”, deklaroi Berisha.
Ai theksoi se “Forumi botëror i partive të qendrës së djathtë u njoh me përdorimin nga ana e Edi Ramës të bandave të rrezikshme jo vetëm nga Shqipëria, por edhe nga rajoni dhe Evropa”.
Sipas Berishës, në këtë listë të lidhjeve me krimin përfshihen edhe emra si Sara Mila, ministri i Brendshëm, Ervin Hoxha dhe Taulant Balla.
Më tej shtoi se kryeministri Edi Rama nuk ka të ardhme. Sipas tij, qytetarët duhet të zhvillojnë një betejë për garantimin e votës së lirë.
“Zgjedhjet në Shqipëri ishin farsa elektorale më e shëmtuar pas rënies së perdes së hekurt në Ballkan dhe Europë. Ju përshëndes ju dhe u garantoj se Edi Rama kurrë nuk do mund të qëndrojë në atë karrige me zgjedhje të vjedhura dhe zgjedhje krimi, korrupsionit por do marrë përgjigjen që meriton që ka çdo narko diktator. Të dashur qytetarë. Zgjedhjet e 11 majit ishin botërisht të njohura si farsë elektorale edhe para se të zhvilloheshin” – tha Berisha ndër të tjera.
