Partia Demokratike ka thirrur një protestë ditën e sotme, pavarësisht se Policia e Tiranës ka refuzuar dhënien e lejes për zhvillimin e saj, për arsye sigurie. Sipas autoriteteve, tubimi i kërkuar do të mbahej në afërsi të perimetrit të sigurisë ku zhvillohet Samiti i Komunitetit Politik Europian, çka përbën rrezik potencial për mbarëvajtjen e aktivitetit ndërkombëtar.
Megjithatë, Partia Demokratike nuk është tërhequr nga organizimi i protestës, duke e zhvendosur vendndodhjen nga Bulevardi i Ri në një tjetër zonë të qendrës së kryeqytetit.
“Nesër protesta do të zhvillohet te Bulevardi Zogu i Parë, kryqëzimi me rrugën Fortuzi, te Ministria e Drejtësisë, ora 17:00”, thuhet në njoftimin zyrtar të PD-së.
Lideri demokrat Sali Berisha foli dy ditë më parë për qëllimin e protestës, duke theksuar se ajo synon të sensibilizojë liderët europianë që marrin pjesë në Samit. “Ata duhet të dinë se ndodhen në një shtet që nuk respekton asnjë rregull, asnjë parim të votës së lirë,” deklaroi Berisha.
