Eurodeputeti Fredi Beleri, njëherësh anëtar i Partisë PBDNJ, e cila është në koalicion me Partinë Demokratike, ka kërkuar publikisht pas humbjes së zgjedhjeve që Sali Berisha të japë dorëheqjen nga drejtimi i PD. Në një intervistë për MCN TV, Beleri theksoi se organet e PD duhet të bëjnë një reflektim të thellë.
“Zoti Berisha duhet të vendos, organet e PD duhet të vendosin, të reflektojnë dhe duhet të bëjnë gjithçka për të marrë fund kjo tirani, pse jo dhe dorëheqje” – tha Beleri.
Ai gjithashtu tha se ajo që duhet të bëjë opozita është që të bind qytetarët dhe të sensibilizojë faktorin ndërkombëtar dhe nuk mund të pres nga La Civita për të zgjidhur hallet e saj.
“Opozita më e madhe duhet të shikojë nga vetja dhe të mundohet të sensibilizojë faktorin ndërkombëtar për këtë regjim. Nuk ka diskutim që zgjedhjet janë vjedhur, kjo dihej më parë. Duhet të bindim qytetarët se nuk duhet të presim nga La Civita, nga ndonjë gjerman apo grek të zgjidhë hallet tona” – tha më tej ai.
Beleri është anëtari i parë i Koalicionit që kërkon publikisht dorëheqjen e Sali Berishës, pas humbjes katastrofale të opozitës. Madje, ai ka treguar më shumë guxim se përfaqësuesit brenda PD-së, të cilët nuk arrijnë as të përmendin nenin “Basha” që kanë përcaktuar në statutin e partisë, sipas të cilit kryetari që humb zgjedhjet duhet të largohet nga drejtimi i PD-së.
