Kreu i Partisë Demokratike, Sali Berisha, njoftoi dy ditë më parë se më 16 maj, në orën 17:00, do të zhvillohej një protestë në Bulevardin “Zogu I Parë”, si kundërshtim ndaj rezultatit të zgjedhjeve, të cilat ai i konsideroi si “më të grabiturat në historinë shqiptare”.
Megjithatë, kërkesa e PD-së për zhvillimin e protestës nuk është miratuar nga Policia e Shtetit. Sipas autoriteteve, vendndodhja e përzgjedhur është shumë pranë sheshit “Skënderbej”, ku po zhvillohen përgatitjet për samitin e liderëve të Bashkimit Europian në Tiranë.
Policia argumenton se prania e delegacioneve të huaja dhe masat e sigurisë që po merren për këtë ngjarje të nivelit të lartë nuk lejojnë zhvillimin e tubimeve të tjera pranë zonës së samitit.
