Në qarkun e Lezhës, vota e diasporës po luan një rol vendimtar për ndarjen përfundimtare të mandateve mes Partisë Demokratike (PD) dhe Partisë Socialiste (PS).
Pas numërimit të votave brenda vendit, PD ka një epërsi prej rreth 2 mijë votash ndaj PS-së. Megjithatë, votat nga diaspora, ku aktualisht PS ka një avantazh të lehtë, mund të ndryshojnë balancën dhe të përcaktojnë nëse njëra parti do të marrë 4 mandate apo do të mbetet me 3.
Deri tani janë konfirmuar 4 deputetë: nga PD – Agron Gjekmarkaj dhe Elda Hoti, dhe nga PS – Ulsi Manja dhe Ermal Pacaj. Beteja për mandatin e pestë mbetet e hapur dhe po zhvillohet nëpërmjet listave të hapura, ku garojnë kandidatët me më shumë vota preferenciale.
Në PS, Pranvera Skana kryeson ndaj Aurora Gjeloshit dhe Admir Kadelit. Në PD, më i votuari është Gjin Gjoni, i ndjekur nga Aleksandër Lala dhe Edison Doçi.
Ndërkohë, forca e tretë politike në këtë qark është Koalicioni “Nisma Shqipëria Bëhet”, i ndjekur nga Partia Socialdemokrate dhe Koalicioni Euroatlantik, por asnjë prej tyre nuk arriti të sigurojë mandat.
Të dhënat
Partia Demokratike ka dalë fituese në Qarkun e Lezhës, duke siguruar 29,483 vota, që përbëjnë 45.13% të totalit të votave të numëruara brenda vendit. Partia Socialiste renditet e dyta me 27,585 vota ose 42.23%, duke e bërë këtë një nga garat më të ngushta të këtyre zgjedhjeve.
Në bazë të këtij rezultati, ndarja aktuale e mandateve në Lezhë është:
Partia Demokratike – 4 mandate
Partia Socialiste – 3 mandate
Megjithëse Partia Demokratike kryeson në numrin e përgjithshëm të votave brenda vendit, diferenca e ngushtë prej vetëm 1,898 votash mes dy partive kryesore ka vënë rezultatin në dorë të votave nga diaspora. Deri tani janë numëruar 6,228 nga gjithsej 11,835 zarfa, dhe Partia Socialiste po kryeson me 544 vota diferencë.
Diaspora
Me mbi 5,600 zarfa ende për t’u numëruar, përparësia e Partisë Socialiste në diasporë mund të ngushtojë ndjeshëm rezultatin ose të ndikojë në ndarjen përfundimtare të mandateve. Bashkë me votë e diasporës diferenca PD-PS është 1358 vota në favor të PD.
