Kryetari i Partisë Demokratike, Sali Berisha, ka marrë pjesë në samitin e Unionit Demokratik Ndërkombëtar (IDU) në Bruksel, ku ka mbajtur një fjalim të fortë kundër qeverisë së Edi Ramës.
Gjatë fjalës së tij, Berisha akuzoi qeverinë për vjedhjen e zgjedhjeve të 11 majit, duke e cilësuar Shqipërinë si një “narkoshtet” që ka uzurpuar vullnetin e qytetarëve.
“Zgjedhjet e 11 majit u vodhën nga narkoshteti. Kjo është një dramë për demokracinë shqiptare. Prandaj kërkoj solidaritetin dhe mbështetjen tuaj që kombi im të votojë i lirë,” u shpreh Berisha përpara liderëve të qendrës së djathtë ndërkombëtare.
Ai theksoi se mbështetja ndërkombëtare është jetike për të rikthyer standardet demokratike në Shqipëri dhe garantimin e zgjedhjeve të ndershme dhe transparente.
“Solidariteti i komunitetit ndërkombëtar është vendimtar për fitoren e kësaj kauze,” shtoi Berisha.
Samiti i IDU mblodhi drejtues dhe përfaqësues të partive konservatore nga e gjithë bota, duke u bërë një platformë ku Berisha përcolli shqetësimin për situatën politike dhe zgjedhore në vend.
