Kreu i Partisë Demokratike, Sali Berisha, ka komentuar vendosjen e mjekut Ilir Alimehmeti jashtë listës së sigurt për deputetë dhe mungesën e tij në Kuvend, duke theksuar se Alimehmeti mbetet një figurë me reputacion të lartë dhe pëlqyeshmëri të madhe publike.
Në një deklaratë për mediat, Berisha tha se Alimehmeti nuk ka humbur asgjë me mospërfshirjen në parlament, por përkundrazi, ka dëshmuar mbështetje të gjerë nga qytetarët.
“Ilir Alimehmeti nuk humbi gjë, përkundrazi, tregoi shkallën e lartë të pëlqyeshmërisë që gëzon. Ai është një veprimtar shumë i respektuar nga qytetarët, kjo u pa edhe në numrin e madh të votave që mori,” u shpreh Berisha.
Sipas tij, përfaqësimi i një figure politike nuk kufizohet vetëm me praninë në Kuvend, pasi një parti ka një gamë të gjerë mekanizmash për të përfshirë dhe promovuar individë me vlerë.
“Doktor Alimehmeti ka një reputacion shumë të mirë dhe është një aset për PD-në dhe skenën politike shqiptare,” theksoi kreu i opozitës.
