Një ngjarje tronditëse ka ndodhur në Argjentinë, ku një instruktor fluturimi humbi jetën pasi u hodh nga një avion në lëvizje, duke lënë studenten e tij 22-vjeçare të vetme në kabinë për të kryer uljen.
Sipas Prokurorisë argjentinase, instruktori Leandro Andrés Bertazzo, 42 vjeç, ndodhej në bordin e një avioni tip Cessna 150 së bashku me studenten Rosario gjatë një fluturimi stërvitor pranë qytetit Toledo, në Argjentinën qendrore.
Mediat vendase raportojnë se pak çaste para ngjarjes, Bertazzo i tha studentes: “Ti e di çfarë duhet të bësh, vazhdo.” Më pas ai hoqi kufjet, zgjidhi rripin e sigurimit, hapi derën e avionit dhe u hodh në ajër.
Rosario, megjithëse në gjendje shoku, arriti ta ulte avionin në mënyrë të sigurt, pa shkaktuar dëme në mjetin fluturues.
Drejtori i shkollës së fluturimit ku punonte Bertazzo deklaroi se asgjë nuk linte të kuptohej se instruktori po kalonte një krizë apo kishte planifikuar një veprim të tillë. Ai e përshkroi 42-vjeçarin si një njeri të dashur dhe profesionist me përvojë të gjatë, i cili kishte punuar edhe si instruktor fluturimi në Kili.
Sipas tij, hapja e derës së një avioni të vogël gjatë fluturimit është jashtëzakonisht e vështirë për shkak të forcës së ajrit, duke e krahasuar me përpjekjen për të hapur derën e një makine që lëviz me 200 kilometra në orë.
Autoritetet argjentinase kanë nisur hetimet për të sqaruar plotësisht rrethanat e kësaj ngjarjeje tragjike.
