Një zhvillim i pazakontë ka ndodhur në Hungari, ku disa prej mediave kryesore publike kanë ndërprerë transmetimet pas ndryshimit të pushtetit politik në vend, pas humbjes së zgjedhjeve parlamentare nga kampi i ish-kryeministrit Viktor Orban.
Në ekranin e televizionit shtetëror M1 është shfaqur një sfond i zi me një mesazh ku thuhej: “Media nuk mund të gënjejë. Kërkojmë falje që e kemi bërë këtë për vite me radhë.”
Televizioni M1 prej vitesh është konsideruar nga kritikët si një prej mediave më të afërta me qeverinë e Orbanit, ndërsa është akuzuar shpesh nga opozita dhe organizatat e medias për mungesë të pavarësisë editoriale dhe për pasqyrim në favor të qeverisë. Sipas raportimeve të mediave hungareze, ndërprerja e transmetimeve ka prekur edhe radion publike Kossuth Radio, ndërsa faqet online të këtyre institucioneve kanë shfaqur gjithashtu ekrane të zeza.
Kryeministri i ri i Hungarisë, Péter Magyar, ka deklaruar se mediat publike do të kalojnë nën një administrim të ri. Sipas tij, përkohësisht do të pezullohen programet informative, ndërsa në radio do të transmetohet vetëm program muzikor nga një stacion partner.
Magyar e ka cilësuar këtë zhvillim si një moment historik, duke deklaruar se periudha e propagandës në mediat publike ka përfunduar. Në një reagim në rrjetet sociale, ai akuzoi mediat publike se për vite me radhë kishin shpërndarë informacion të njëanshëm dhe se ky model tashmë do të ndryshojë.
Gjatë 16 viteve të qeverisjes së Viktor Orbanit, sistemi mediatik hungarez është përballur me kritika të vazhdueshme nga kundërshtarët politikë dhe organizatat ndërkombëtare të medias, të cilat kanë ngritur shqetësime për përqendrimin e kontrollit mbi informacionin dhe dobësimin e pavarësisë editoriale të mediave publike.
Partia e Péter Magyar, Tisza, fitoi zgjedhjet parlamentare me premtimin për një reformim të thellë të institucioneve publike, përfshirë sistemin mediatik, dhe rikthimin e standardeve të pavarësisë në transmetuesit shtetërorë. Pas marrjes së detyrës, qeveria e re ka nisur një rishikim të mënyrës së funksionimit dhe financimit të mediave publike.
Ndërkohë, Viktor Orban e ka kundërshtuar këtë proces, duke e cilësuar atë si “një tjetër hap të tiranisë së Tiszas”, duke akuzuar qeverinë e re se po përdor pushtetin për të ndryshuar strukturat mediatike sipas interesave të saj politike.
