Ish-deputetja e Partisë Socialiste, Marjana Koçeku, ka zbuluar se me kryeministrin Edi Rama komunikoi vetëm tre ditë pasi kishte marrë vendimin për t’u larguar nga grupi parlamentar i PS-së dhe për të vijuar mandatin si deputete e pavarur.
E ftuar në emisionin Now në Euronews Albania, Koçeku tha se zgjodhi me vetëdije të mos i përgjigjej telefonatave dhe mesazheve të Ramës menjëherë, pasi donte që vendimi i saj të ishte tërësisht personal dhe i pandikuar.
“Me kryeministrin Rama kam komunikuar tre ditë pasi e kam marrë vendimin. Ky ka qenë një vendim personal, që të mos ketë asnjë hapësirë ndikimi mbi atë që kisha vendosur të bëja dhe të thosha. Vetëm pas tre ditësh iu përgjigja një sërë telefonatash dhe mesazhesh prej tij”, u shpreh ajo.
Koçeku tha se nuk dëshiron të bëjë publike përmbajtjen e plotë të bisedës me kryeministrin, duke argumentuar se bëhet fjalë për një komunikim privat. Megjithatë, ajo zbuloi se Rama e kishte paralajmëruar për pasojat që, sipas tij, do të sillte vendimi i saj.
“Ai më paralajmëroi se do të mbetem vetëm dhe se nuk do të më besojë askush pas këtij akti, as njerëzit e mi të maleve prej nga vij”, tha ish-deputetja.
Sipas Koçekut, ky parashikim nuk do të realizohet. Ajo u shpreh se është mësuar të jetë e pavarur dhe se nuk ka ndërmend të tërhiqet nga vendimi që ka marrë.
“Unë ia kam konfirmuar dhe vazhdoj t’ua konfirmoj të gjithë atyre që besojnë te kryeministri se nuk do të mbetem vetëm. Jam mësuar të jem e pavarur, është pjesë e karakterit tim dhe nuk tërhiqem. Nuk ka kthim pas në këtë vendim”, deklaroi Koçeku.
