Kryetari i PD, Sali Berisha, kritikoi përdorimin e 4 milionë eurove për koncertin e Kanye West që pritet të mbahet në Tiranë më 11 korrik, duke deklaruar se këto fonde mund të përdoreshin për emergjenca të tjera, si përballimi i situatave me zjarret.
Në një deklaratë për mediat, Berisha e cilësoi vendimin e qeverisë si të papërgjegjshëm, duke argumentuar se fondet e emergjencave duhet të përdoren vetëm për raste të jashtëzakonshme dhe jo për organizimin e aktiviteteve artistike.
Kreu i PD-së akuzoi kryeministrin Edi Rama se po përdor paratë publike për interesa politike, ndërsa pretendoi se institucione shtetërore dhe shkolla po përgatisin lista me persona që do të marrin pjesë në koncert. Sipas tij, administratës mund t’i mbahen kostot e biletave nga pagat.
Megjithatë, përtej kritikave politike ndaj përdorimit të fondit, Berisha nuk bëri të ditur nëse PD do të ndërmarrë ndonjë hap konkret institucional apo ligjor për të kundërshtuar aktin normativ dhe mënyrën e alokimit të fondeve.
Berisha gjithashtu reagoi edhe për ndalimin e tre deputetëve të koalicionit shqiptar VLEN në pikën kufitare të Qafë Thanës. Ai akuzoi kryeministrin Edi Rama se qëndron pas këtij veprimi, ndërsa tha se deputetët Bekim Çoku, Adnan Hazizi dhe Hasim Myrtezani janë trajtuar në mënyrë të papërshtatshme. Sipas Berishës, ngjarja lidhet me zhvillimet politike në Shqipëri dhe protestat e fundit.
