Presidenti i Rusisë, Vladimir Putin, ka akuzuar Perëndimin se po përpiqet të rikthejë lidershipin global “me çdo kusht”, duke përdorur, sipas tij, edhe metoda “të pandershme” në përballjen me konkurrentët ndërkombëtarë.
Duke folur të premten në një panel të Forumit të Biznesit të BRICS-it, në kryeqytetin indian, Nju Delhi, Putin u shpreh se pas çdo historie suksesi të një kompanie qëndron puna intensive e përditshme dhe përballja me “konkurrencë të ashpër”.
“Vazhdimisht na është thënë se konkurrenca është një ‘lopë e shenjtë’, diçka që nuk duhet prekur në asnjë mënyrë. Fatkeqësisht, megjithatë, konkurrentët tanë perëndimorë aktualisht po përpiqen të rifitojnë lidershipin e tyre të dikurshëm me çdo kusht”, deklaroi Putin.
Presidenti rus tha se konkurrenca, sipas tij, në disa raste po merr forma “të pandershme”, duke theksuar se këto praktika nuk kufizohen vetëm te kompanitë, por shfaqen edhe në nivel shtetëror.
Putin përmendi si shembuj veprime që, sipas tij, përfshijnë goditje të drejtpërdrejta ndaj objekteve industriale dhe logjistike, si dhe ndaj tubacioneve dhe infrastrukturës së transportit.
“Po bëhen përpjekje për të bllokuar korridoret ndërkombëtare të transportit dhe për të sekuestruar anije”, tha ai.
Më tej, Putin akuzoi vendet perëndimore se po vendosin kufizime që ai i konsideron të paligjshme, të shoqëruara me kërcënime për sanksione dytësore ndaj shteteve dhe kompanive që refuzojnë të veprojnë në interes të vendeve të tjera dhe zgjedhin të mbrojnë interesat e tyre.
Në fjalën e tij, presidenti rus u ndal edhe te sanksionet e vendosura ndaj Moskës, duke pretenduar se numri i tyre ka kaluar 30 mijë.
“Ndaj Rusisë janë vendosur më shumë se 30 mijë sanksione, që është pothuajse dyfishi i numrit të sanksioneve të vendosura ndaj të gjitha vendeve të botës së bashku”, deklaroi Putin.
Sipas tij, presioni ekonomik dhe politik i Perëndimit nuk e ka dobësuar Rusinë në mënyrën e synuar, por ka nxitur Moskën të forcojë pavarësinë e saj ekonomike dhe politike.
“Ne kemi forcuar sovranitetin tonë kombëtar dhe po zhvillojmë lidhje me partnerë të besueshëm dhe të parashikueshëm”, tha Putin, duke shtuar se BRICS-i është i gatshëm të bashkëpunojë me të gjithë partnerët.
Putin mbërriti të premten në Indi për një vizitë treditore. Gjatë qëndrimit të tij, presidenti rus do të marrë pjesë në Samitin e 18-të të BRICS-it, i cili zhvillohet të shtunën dhe të dielën në Nju Delhi.
Deklaratat e Putinit vijnë në një kohë tensionesh të larta gjeopolitike, me Rusinë që kërkon të forcojë bashkëpunimin me vendet e BRICS-it dhe partnerët e tjerë jashtë strukturave tradicionale ekonomike dhe politike të Perëndimit.
