Europa po përshpejton projektin e saj për krijimin e një rrjeti satelitor të pavarur dhe të sigurt, në përpjekje për të zvogëluar varësinë nga operatorë të huaj si Starlink i Elon Musk.
Në samitin hapësinor të zhvilluar në Paris, janë shpallur kontrata të reja për sistemin europian IRIS², rrjeti i ardhshëm i komunikimeve satelitore të Bashkimit Europian.
Kompania Thales Alenia Space, një sipërmarrje e përbashkët mes grupit francez Thales dhe kompanisë italiane Leonardo, ka marrë një kontratë me vlerë rreth 500 milionë euro.
Ajo do të furnizojë pajisjet qeveritare për 330 satelitë me orbitë të ulët të IRIS².
Ndërkohë Airbus do të ndërtojë shtresën e parë të konstelacionit, e cila do të përbëhet nga të paktën 66 satelitë.
Kontrata e përgjithshme e sistemit IRIS² pritet të kalojë 3 miliardë euro, ndërsa lëshimet e para janë planifikuar të fillojnë në vitin 2029.
Projekti shihet si përgjigjja strategjike e Europës ndaj rrjeteve të mëdha private satelitore, veçanërisht Starlink.
Drejtori i përgjithshëm i Agjencisë Europiane të Hapësirës, Josef Aschbacher, paralajmëroi megjithatë se Europa rrezikon të krijojë shumë sisteme kombëtare të ndara nga njëri-tjetri.
Gjermania, për shembull, po punon për një rrjet të vetin ushtarak satelitor. Aschbacher tha se sistemet duhet të jenë të ndërveprueshme, në mënyrë që investimet europiane të mos fragmentohen.
Ai ka hedhur gjithashtu një propozim shumë më ambicioz: 1 miliard euro në vit për dhjetë vjet, duke nisur nga 2029, për t’i dhënë Europës kapacitetin që në të ardhmen të dërgojë astronautë në hapësirë me mjetet e veta, pa qenë e varur nga anijet amerikane.
Vendimi nëse do të financohet ky program pritet në vitin 2028.
Presidenti francez Emmanuel Macron ka kërkuar gjithashtu më shumë koordinim mes vendeve europiane dhe që prokurimet publike në sektorin hapësinor të drejtohen sa më shumë drejt kompanive europiane.
