Çmimi i naftës po shkon drejt mbylljes së javës mbi 100 dollarë për fuçi për herë të parë që prej mesit të majit, ndërsa përshkallëzimi i konfliktit në Lindjen e Mesme ka shtuar frikën për ndërprerje afatgjata të furnizimeve.
Sipas të dhënave më të fundit të Reuters, nafta Brent tregtohej të premten rreth 105.62 dollarë për fuçi, ndërsa nafta amerikane WTI rreth 101.10 dollarë. Pavarësisht një tërheqjeje nga nivelet më të larta të ditës, të dyja janë rritur afro 13% gjatë javës, duke shënuar performancën më të fortë javore që prej korrikut.
Të enjten situata ishte edhe më e tensionuar, kur Brent u mbyll në 107.63 dollarë, ndërsa WTI në 102.48 dollarë, pasi një seri sulmesh ndaj cisternave dhe infrastrukturës energjetike shtoi frikën se rrugët kryesore të transportit të naftës mund të bllokohen për një periudhë të gjatë.
Një nga pikat më kritike mbetet Ngushtica e Hormuzit. Të dhënat e Kpler tregojnë se më 10 shtator vetëm shtatë anije kaluan përmes saj, shumë më pak se mesatarja e ditëve të fundit dhe në kontrast të fortë me rreth 125 anije të mëdha tregtare që kalonin çdo ditë përpara luftës. Përmes Hormuzit kalonte afërsisht një e pesta e furnizimit botëror me naftë bruto dhe gaz natyror të lëngshëm.
Tensionet janë shtuar edhe në Jemen, ku Houthit e mbështetur nga Irani kanë marrë kontrollin e portit strategjik të Mocha-s dhe po avancojnë përgjatë bregdetit të Detit të Kuq. Zhvillimi rrezikon edhe rrugën alternative të eksportit të naftës saudite përmes Detit të Kuq.
Goditja po ndihet tashmë nga konsumatorët. Në SHBA, çmimi mesatar i naftës diesel ka kaluar 6 dollarë për gallon për herë të parë.
Tregjet po monitorojnë gjithashtu sulmet ukrainase ndaj rafinerive ruse, të cilat po shtojnë presion mbi furnizimin global me produkte të rafinuara.
Analistët paralajmërojnë se nëse ndërprerjet fizike të furnizimit vazhdojnë, nafta mund të testojë sërish nivelet e larta të regjistruara në mars. Për momentin, faktori vendimtar nuk është më vetëm retorika politike, por sasia reale e naftës që arrin në treg.
