Një problem i rëndë teknik në sistemin britanik të kontrollit të trafikut ajror ka shkaktuar kaos në aeroportet e vendit, duke çuar në anulimin e 2,093 fluturimeve brenda dy ditësh dhe duke prekur rreth 330 mijë pasagjerë.
Problemi nisi të martën në sistemet e National Air Traffic Services, NATS, që ofron shërbimet e kontrollit ajror për 15 aeroporte në Britani. Edhe pse defekti teknik u zgjidh, pasojat vazhduan edhe të nesërmen, me anulime dhe vonesa të shumta.
Sipas kompanisë së analizave të aviacionit Cirium, vetëm më 8 shtator u prekën mbi 1,700 fluturime, ndërsa më 9 shtator u regjistruan qindra anulime të tjera.
British Airways ishte ndër kompanitë më të goditura. Ajo anuloi afro 550 fluturime, duke prekur rreth 85 mijë klientë. Kompania tha se kishte arritur të rezervonte fluturime alternative për më shumë se 60 mijë prej tyre.
Problemet prekën Heathrow, Gatwick, Manchester, Stansted dhe aeroporte të tjera të mëdha. Pasagjerë të shumtë mbetën për orë të tëra në terminale, ndërsa disa fluturime u devijuan drejt aeroporteve të tjera.
Ministrja britanike e Transportit, Heidi Alexander, ka kërkuar nga drejtori i NATS, Martin Rolfe, një raport të plotë brenda një jave për të përcaktuar shkakun e defektit dhe masat që duhet të merren.
Autoriteti i Aviacionit Civil do të zhvillojë gjithashtu një hetim të pavarur. Qeveria ka bërë të ditur se deri tani nuk ka prova që incidenti të ketë qenë rezultat i një sulmi kibernetik.
Presioni ndaj drejtuesit të NATS është shtuar. Ryanair dhe Wizz Air kanë kërkuar largimin e tij, duke argumentuar se ky është incidenti i tretë serioz në sistemin britanik të kontrollit ajror brenda pak më shumë se tre vitesh.
Kaosi pati pasoja edhe përtej udhëtarëve. Organizata Anthony Nolan njoftoi se disa korrierë që transportonin qeliza staminale për pacientë që prisnin transplante u prekën nga anulimet dhe u detyruan të gjenin rrugë alternative.
Ndërsa fluturimet po i rikthehen gradualisht normalitetit, autoritetet britanike po përballen me pyetjen se si një problem i vetëm teknik arriti të paralizonte një pjesë kaq të madhe të sistemit të aviacionit.
