Qeveria shqiptare ka përgatitur një projektligj që parashikon reformimin rrënjësor të institucioneve të administrimit dhe trajtimit të pronës në vend. Siç raportoi dje VNA, nisma ligjore synon shkrirjen e Agjencisë Shtetërore të Kadastrës (ASHK) dhe Agjencisë së Trajtimit të Pronës (ATP), duke i bashkuar ato në një strukturë të vetme ligjore e administrative: Agjencinë Shtetërore të Pronave (ASHP).
Kjo super-agjenci do të përqendrojë në një dorë të vetme dy nga proceset më komplekse dhe historikisht më problematike në Shqipëri — regjistrimin e titujve të pronësisë dhe procesin e kthimit e kompensimit të pronave.
Burime për VNA bëjnë me dije se në krye të këtij super-institucioni po projektohet të vendoset Valdrin Pjetri. Pjetri ushtron detyrën e Drejtorit të Përgjithshëm të Agjencisë së Trajtimit të Pronës (ATP) në varësi të Ministrisë së Drejtësisë.
Rritja e profilit të tij publik është vënë re javët e fundit, ku Ministria e Drejtësisë ka promovuar aktivisht punën dhe arritjet e tij në rrjetet sociale. Paralelisht, vetë Pjetri është shfaqur në disa intervista televizive për të shpjeguar ecurinë e procesit të kompensimit të pronarëve, çka interpretohet si përgatitje e terrenit publik për marrjen e drejtimit të ASHP-së.
Për Pjetrin, ky propozim shënon një rikthim të plotë në nivelet më të larta të administratës publike, pasi mbylli llogaritë me drejtësinë që i pengonin ushtrimin e funksioneve shtetërore.
Në zgjedhjet vendore të vitit 2019, ai u zgjodh kryetar i Bashkisë Shkodër si kandidat i Partisë Socialiste. Megjithatë, ai nuk e ushtroi asnjë ditë mandatin dhe u dorëhoq përpara betimit, pasi Partia Demokratike publikoi dokumente që tregonin se ai kishte pasur një dënim në Itali për çështje droge.
Pjetri sqaroi publikisht se bëhej fjalë për një episod të periudhës së rinisë (studentore), lidhur me bashkëjetuesit e tij në banesë me të cilët ndante qiranë, ku ai ishte dënuar pa dijeni për disa cigare kanabis dhe pa pasur mundësi të mbrohej në atë proces.
Pas kësaj ngjarjeje, ai ndoqi rrugën ligjore për të pastruar figurën e tij, duke provuar përfundimisht se ndalesat e ligjit të dekriminalizimit nuk e kapnin dhe se nuk kishte asnjë pengesë ligjore për të ushtruar detyra publike.
Rikthimi i tij fillimisht në krye të ATP-së dhe tashmë projektimi në krye të Agjencisë Shtetërore të Pronave e vendos atë në pikën më nevralgjike të administratës. Sipas burimeve, ai pritet të jetë "fytyra e re" e qeverisë për të zgjidhur ngërçin e pronave — një nga plagët më të mëdha sociale, ekonomike dhe ligjore në Shqipërinë e tranzicionit.
