Presidenti amerikan Donald Trump ka refuzuar një kërkesë të drejtpërdrejtë të Princit të Kurorës së Arabisë Saudite, Mohammed bin Salman, që Shtetet e Bashkuara të ndërmarrin sulme ushtarake kundër Houthive në Jemen.
Sipas një raportimi të Axios të konfirmuar nga Reuters, Mohammed bin Salman zhvilloi dy telefonata me Trump të enjten, duke kërkuar një ndërhyrje të drejtpërdrejtë amerikane kundër grupit të mbështetur nga Irani.
Presidenti amerikan nuk e pranoi kërkesën.
Zyrtarë amerikanë kanë bërë të ditur se administrata nuk planifikon, të paktën për momentin, të hapë një operacion të ri ushtarak kundër Houthive. Në vend të kësaj, Uashingtoni synon të rrisë mbështetjen për Arabinë Saudite dhe të ndihmojë në forcimin e mbrojtjes së saj.
Komandanti i Komandës Qendrore të SHBA-së, admirali Brad Cooper, është nisur drejt Arabisë Saudite për konsultime urgjente mbi situatën.
Vendimi i Trump vjen në një moment kur konflikti në Jemen po merr përmasa më të rrezikshme. Houthit kanë avancuar përgjatë bregdetit të Detit të Kuq dhe kanë marrë portin strategjik të Mocha-s, duke ngritur shqetësime për sigurinë e rrugëve detare pranë Bab el-Mandebit.
Arabia Saudite ka kërkuar të ndërtojë një koalicion ndërkombëtar për mbrojtjen e lundrimit në Detin e Kuq, por administrata Trump duket se dëshiron të shmangë futjen e drejtpërdrejtë në një tjetër front.
Përparësia e Uashingtonit mbetet përballja me Iranin dhe garantimi i lundrimit përmes Ngushticës së Hormuzit.
Edhe Pakistani, i cili së bashku me Arabinë Saudite dhe Turqinë është pjesë e marrëveshjes së mbrojtjes së Mekës, ka deklaruar se nuk është diskutuar ndonjë përgjigje ushtarake ndaj sulmeve të Houthive.
As Shtëpia e Bardhë dhe as Ambasada saudite nuk dhanë menjëherë koment mbi telefonatat mes Trump dhe Mohammed bin Salman.
