Deputetët socialistë dhe demokratë kanë zhvendosur përplasjet mes tyre ditën e sotme në Strasburg, ku morën pjesë në mbledhjen e radhës të Komitetit të Stabilizim-Asociimit Shqipëri-Bashkimi Evropian.
Edhe pse u shfaqën në të njëjtën tryezë përballë eurodeputetëve, përfaqësuesit e mazhorancës dhe opozitës dhanë versione të ndryshme për situatën politike në Shqipëri dhe për ecurinë e procesit të integrimit evropian.
Kreu i grupit parlamentar socialist, Taulant Balla, vlerësoi reformat e ndërmarra nga Shqipëria dhe u shpreh optimist se vendi është pranë një tjetër hapi të rëndësishëm në negociatat me Bashkimin Evropian.
Sipas Ballës, Shqipëria pret mbylljen e tre kapitujve të rinj dhe po përgatitet për Konferencën e radhës Ndërqeveritare.
Nga ana tjetër, kreu i grupit parlamentar demokrat, Gazment Bardhi, solli në vëmendje problematikat që lidhen me drejtësinë dhe luftën kundër korrupsionit. Ai ngriti shqetësime për rolin e institucioneve dhe ndikimin që mund të kenë zhvillimet e brendshme politike në rrugën evropiane të vendit.
Përballë këtyre qëndrimeve të ndryshme, raportuesi për Shqipërinë në Parlamentin Evropian, Andreas Schieder, vlerësoi progresin e bërë nga vendi, por theksoi se procesi i integrimit kërkon vijimin e reformave dhe zbatimin e tyre në praktikë.
Sipas tij, mbyllja e kapitujve të negociatave është një hap i rëndësishëm, por rezultati i vërtetë duhet të ndihet nga qytetarët në jetën e përditshme.
Në takimin në Strasburg u diskutua edhe për zonën e mbrojtur të Zvërnecit. Eurodeputetët që kanë vizituar këtë zonë kërkuan garanci nga qeveria shqiptare për mbrojtjen e biodiversitetit dhe ruajtjen e pasurive natyrore të saj.
