Pamjet e disa të rinjve të prangosur dhe të shtrirë në dysheme, të publikuara gjatë natës së 15 tetorit, kanë ngritur pikëpyetje mbi mënyrën e ndërhyrjes së Policisë së Shtetit gjatë protestave të dhunshme në Tiranë.
Në videot e shpërndara në rrjetet sociale shfaqen disa persona të shtrirë përtokë, me duart e prangosura. Fillimisht u pretendua se pamjet ishin regjistruar brenda ambienteve të një komisariati, por Policia e Tiranës e mohoi këtë version përmes një reagimi zyrtar të publikuar pak pas mesnatës.
Sipas Policisë, personat e shfaqur në video u kapën në flagrancë në ambientet e një institucioni shtetëror, teksa tentonin të hynin brenda dhe sulmonin punonjësit e policisë. Pamjet, sipas saj, tregojnë momentet e para të neutralizimit, ndërsa më pas të ndaluarit u shoqëruan në komisariat.
Megjithatë, në reagimin e saj Policia nuk identifikoi institucionin ku ndodhi ndërhyrja dhe nuk dha hollësi mbi kohën gjatë së cilës personat u mbajtën të prangosur në dysheme.
Ngjarja ishte një tjetër episod i natës së dhunshme në kryeqytet, ku protestat u shoqëruan me sulme ndaj institucioneve, dëmtime të bizneseve dhe përplasje me forcat e rendit.
Qytetarët kanë të drejtë të protestojnë, qofshin studentë, gjimnazistë apo pjesëtarë të tjerë të shoqërisë. Dhuna dhe shkatërrimi i pronës nuk justifikohen. Por ngjarjet e mbrëmshme kanë ngritur një pyetje që shkon përtej vetë protestuesve: për çfarë shërben shteti nëse nuk arrin të parandalojë dhunën atëherë kur duhet? Përshkallëzimi i vazhdueshëm i situatës dhe pamjet e ndërhyrjeve policore kanë vënë në qendër të debatit mënyrën se si Policia e Shtetit dhe qeveria po menaxhojnë krizën.
