Jose Mourinho mund të rikthehet te Real Madrid pas 13 vitesh largimi, ndërsa raportimet nga media spanjolle bëjnë me dije se trajneri portugez është aktualisht kandidati kryesor për stolin e “Los Blancos”.
Prej javësh është diskutuar e ardhmja e Alvaro Arbeloa, i cili thuhet se ka humbur besimin e një pjese të rëndësishme të dhomës së zhveshjes, duke shtuar zërat për një ndryshim të afërt në pankinë.
Mes emrave të përmendur për zëvendësimin e tij kanë qenë Didier Deschamps, Jurgen Klopp, Lionel Scaloni, Unai Emery dhe natyrisht Mourinho.
Sipas gazetës “A.S.”, tashmë është arritur një marrëveshje paraprake mes klubit madrilen dhe “Special One”, i cili aktualisht drejton Benfica.
Presidenti Florentino Perez vazhdon ta vlerësojë shumë Mourinhon, pavarësisht largimit të tij në vitin 2013 pas përplasjeve me dhomën e zhveshjes. Sot ai shihet si figura që mund të rikthejë stabilitetin në skuadër.
Sipas raportimeve, zyrtarizimi i rikthimit të tij pritet vetëm pas përfundimit të sezonit, për respekt ndaj Benfica, ndërsa klubi portugez ka nisur të kërkojë zëvendësuesin e tij, me Ruben Amorim si një nga emrat e përfolur.
Edhe gazeta “Marca” raporton se janë bërë përparime të rëndësishme në negociata, ndërsa klauzola e lirimit të Mourinhos thuhet se është vetëm 3 milionë euro.
