Marco Van Basten, ish-fitues i Topit të Artë dhe legjendë e Milanit dhe e kombëtares holandeze, ka folur për problemet e futbollit italian në një intervistë dhënë Carlo Pellegattit me rastin e librit të tij të ri “50 ndeshje, emocione të pafundme, Milani”.
Van Basten u shpreh se “pronarët e huaj janë shkatërrimi i futbollit italian”, duke marrë si shembull edhe Milanin.
Sipas tij, aktualisht në Itali ka shumë pronarë të huaj që nuk kanë lidhje me historinë e klubeve dhe as interes të vërtetë për to. “Është për të ardhur keq. Do të ishte shumë e rëndësishme që futbolli italian të kthehej në duart e italianëve, në mënyrë që të rikthehej në majat e Europës”, tha ai.
Duke folur për kombëtaren italiane dhe Botërorin, Van Basten shtoi: “Kam parë kombëtaren e Italisë dhe tani i mungojnë yjet. Italia gjithmonë ka pasur një portier të madh, një mbrojtës të madh, një mesfushor të madh dhe një sulmues të madh. Sot është e vështirë t’i shohësh këta lojtarë, dhe kjo është e çuditshme. Futbolli italian dikur dominonte botën, sot nuk është më kështu”.
Për Botërorin, ai tha se mbështet Holandën, por nuk pret shumë prej saj, ndërsa shtoi se do të simpatizojë Brazilin e drejtuar nga Carlo Ancelotti.
