Organizata Botërore e Shëndetësisë ka konfirmuar gjashtë raste të infeksionit me hantavirus, nga tetë të dyshuara në një anije turistike, ku deri tani janë raportuar të paktën tre viktima.
Sipas të dhënave paraprake, shkalla e vdekshmërisë në këtë shpërthim llogaritet rreth 38%, ndërsa të gjithë rastet e konfirmuara i përkasin variantit të Andeve, një formë e virusit që në disa situata mund të transmetohet mes njerëzve.
Pavarësisht situatës, OBSH ka theksuar se rreziku për popullsinë globale mbetet i ulët, duke njoftuar se po vijon monitorimi i ngushtë i zhvillimeve epidemiologjike dhe përditësimi i vlerësimit të rrezikut.
Ndërkohë, një anije turistike holandeze ndodhet aktualisht pranë ishullit të Tenerife në Spanjë, ku ka shkaktuar shqetësim dhe reagime të forta nga banorët lokalë.
Pasagjerët pritet të lejohen të zbarkojnë gjatë fundjavës, por planet e autoriteteve kanë hasur kundërshtime nga një pjesë e komunitetit vendas, që shpreh frikë për sigurinë shëndetësore.
Qeveria qendrore në Spanjë ka reaguar ndaj kritikave për mungesë transparence, duke sqaruar se zbarkimi nuk do të bëhet direkt në portin e Tenerife-s. Anija do të qëndrojë në det, ndërsa pasagjerët do të transferohen me traget drejt portit industrial të Granadillës, larg zonave të banuara.
Autoritetet kanë bërë të ditur se menjëherë pas zbarkimit, pasagjerët do të riatdhesohen, ndërsa 14 shtetas spanjollë në bord do të dërgohen në Madrid për karantinë.
Zyrtarët kanë theksuar gjithashtu se nuk do të ketë kontakt mes pasagjerëve dhe banorëve lokalë, duke garantuar se janë marrë të gjitha masat për mbrojtjen e popullsisë.
