Një derdhje e konsiderueshme nafte është zbuluar në Gjirin Persik pranë ishullit strategjik Kharg në Iran, duke ngritur shqetësime për një katastrofë të mundshme mjedisore në një nga zonat më të rëndësishme të eksportit të naftës në botë.
Sipas raportimeve të gazetës “The New York Times”, zona e ndotjes ka kaluar mbi 50 kilometra katrorë, bazuar në analizat e imazheve satelitore të realizuara nga kompania Orbital EOS. Vlerësohet se më shumë se 3 mijë fuçi naftë mund të jenë derdhur në det.
Shkaku i incidentit ende nuk është konfirmuar, ndërsa ngjarja ndodh në një periudhë tensionesh të larta në rajon, pas përplasjeve dhe sulmeve të raportuara gjatë muajve të fundit.
Ishulli Kharg konsiderohet terminali kryesor i eksportit të naftës së Iranit. Në kushte normale, rreth 90% e naftës bruto iraniane eksportohet përmes këtij terminali drejt tregjeve ndërkombëtare.
Sipas raportit, njolla e naftës është zhvendosur gradualisht drejt jugut, duke iu afruar ujërave saudite, çka shton frikën për një incident mjedisor me pasoja ndërkufitare.
Deri tani, autoritetet iraniane nuk kanë reaguar zyrtarisht për ndotjen, ndërsa situata mbetet e paqartë për shkak të mungesës së informacionit të detajuar nga terreni.
Ishulli Kharg mbetet një pikë strategjike për Iranin, i vendosur rreth 30 kilometra nga bregu iranian dhe disa qindra kilometra larg Ngushticës së Hormuzit, një nga korridoret detare më të rëndësishme për tregtinë globale të naftës.
