Inteligjenca amerikane vlerëson se lideri i ri suprem i Iranit, Mojtaba Khamenei, po luan një rol vendimtar në drejtimin e strategjisë ushtarake të Teheranit dhe në negociatat me Shtetet e Bashkuara.
Sipas raportimeve, djali i ish-liderit suprem Ali Khamenei po bashkëpunon ngushtë me drejtuesit më të lartë iranianë për menaxhimin e konfliktit dhe për koordinimin e bisedimeve diplomatike me Uashingtonin.
Mojtaba Khamenei nuk është shfaqur publikisht që prej sulmit të rëndë në fillim të luftës, ku mbeti i plagosur dhe ku u vranë disa nga komandantët më të lartë ushtarakë iranianë. Mungesa e tij në publik ka shtuar spekulimet mbi gjendjen shëndetësore dhe ndikimin e tij real në udhëheqjen e vendit.
Burime të inteligjencës amerikane theksojnë se struktura e autoritetit brenda regjimit iranian mbetet ende e paqartë, megjithatë Mojtaba Khamenei konsiderohet si një nga figurat me ndikimin më të madh në procesin e vendimmarrjes, sidomos për negociatat me SHBA-në për përfundimin e konfliktit.
Nga ana tjetër, administrata e Donald Trump vijon të kërkojë një zgjidhje diplomatike, ndërsa tensionet mes dy vendeve mbeten të larta.
Raporti thekson gjithashtu se Irani vazhdon të ruajë kapacitete të konsiderueshme ushtarake dhe aftësi për t’i bërë ballë për një periudhë të gjatë bllokadës amerikane.
Sipas burimeve, Mojtaba Khamenei shmang përdorimin e pajisjeve elektronike dhe komunikon vetëm përmes takimeve direkte ose korrierëve, duke e bërë shumë të vështirë gjurmimin e vendndodhjes së tij nga shërbimet amerikane.
