Autoritetet britanike kanë njoftuar për një rast të tretë të dyshuar me hantavirus, i lidhur me shpërthimin e infeksionit në bordin e anijes turistike MV Hondius.
Pacienti ndodhet aktualisht në ishullin e largët të Atlantikut, Tristan da Cunha, ku anija kishte ndaluar në mesin e muajit prill.
Deri tani, dy shtetas britanikë janë konfirmuar të infektuar. Njëri prej tyre ndodhet në gjendje stabël në Holandë, pasi u evakuua nga anija të mërkurën, ndërsa tjetri vazhdon të trajtohet në terapi intensive në Afrikën e Jugut, ku ishte transportuar muajin e kaluar.
Në total janë konfirmuar pesë raste me hantavirus, përfshirë një prej tre pasagjerëve që humbën jetën gjatë lundrimit.
Anija MV Hondius pritet të mbërrijë në Ishujt Kanarie gjatë fundjavës, ku qeveria britanike ka organizuar një avion charter për të kthyer në Britani pasagjerët dhe ekuipazhin britanik që ndodhen ende në bord.
Edhe pse asnjë nga britanikët e mbetur nuk shfaq aktualisht simptoma, autoritetet shëndetësore kanë bërë të ditur se ata do të duhet të vetëizolohen për 45 ditë pas kthimit në vend.
Një nga të infektuarit është 56-vjeçari britanik Martin Anstee, ish-oficer policie dhe guidë ekspeditash në anije, i cili u transportua në Holandë bashkë me një anëtar hollandez të ekuipazhit dhe një shtetas gjerman. Ai deklaroi për BBC se ndodhet “mirë”.
Ndërkohë, gjurmimi i kontakteve po vazhdon në disa vende, përfshirë Zvicrën dhe Holandën, për pasagjerët që kishin zbritur nga anija para se të konfirmohej shpërthimi më 4 maj.
World Health Organization e ka cilësuar situatën si “incident serioz”, por theksoi se rreziku për publikun mbetet i ulët dhe se shpërthimi nuk është i krahasueshëm me pandeminë Covid-19.
