Kryeministri Edi Rama ka mohuar pretendimet se procesi i integrimit të Shqipërisë në Bashkimin Evropian është bllokuar për shkak të çështjeve të brendshme politike apo emrave të caktuar në qeveri, një deklaratë që u interpretua si përgjigje ndaj aludimeve për zv/kryeministren Belinda Balluku.
Gjatë një deklarate për mediat, Rama tha se procesi i negociatave nuk varet nga debatet politike të brendshme, por nga vlerësimi objektiv i Komisionit Evropian.
“Sot në Bruksel nuk negocion Shqipëria, por Komisioni. KE i konsideron të përmbushura detyrat e Shqipërisë për këtë fazë dhe për piketat e ndërmjetme. Dhe ai po diskuton me shtetet anëtare. Të thuash se u bllokua nga X apo Y është të shesësh ajër. Kush beson se ajri blihet, ta shesë”, deklaroi Rama.
Sipas tij, Komisioni Evropian e vlerëson procesin “në mënyrë objektive dhe jo politike”, ndërsa theksoi se Shqipëria do të vazhdojë punën për përmbushjen e detyrimeve në kuadër të integrimit europian.
