Tre viktima dhe disa raste të dyshuara me hantavirus në një anije turistike që u nis nga Argjentina kanë vënë në alarm autoritetet shëndetësore ndërkombëtare. Pasagjerët e anijes janë shpërndarë tashmë në vende të ndryshme të botës dhe për këtë arsye ka nisur gjurmimi i kontakteve të tyre. Megjithatë, ekspertët po theksojnë se rreziku për publikun mbetet i kufizuar dhe se situata nuk ngjan me pandeminë e Covid-it.
Ndryshe nga viruset respiratore që përhapen lehtësisht nga njeriu te njeriu, hantavirusi zakonisht transmetohet nga brejtësit. Infektimi ndodh kryesisht kur njerëzit thithin grimca në ajër nga urina, jashtëqitjet apo pështyma e kafshëve të infektuara.
Shqetësimi në rastin e kësaj anijeje lidhet me dyshimet për variantin Andes, një formë më e rrallë e hantavirusit që në raste të kufizuara është parë të transmetohet edhe mes njerëzve. Por autoritetet shëndetësore sqarojnë se kjo kërkon kontakte shumë të afërta dhe të zgjatura dhe nuk ndodh thjesht nga kalimi pranë një personi në rrugë apo në ambiente publike.
Pikërisht për këtë arsye, mediat ndërkombëtare, mes tyre edhe BBC, theksojnë se situata duhet marrë seriozisht, por pa alarm të panevojshëm. Vëmendja kryesore mbetet te personat që kanë qenë në bord ose që kanë pasur kontakte të afërta me të infektuarit.
Simptomat mund të shfaqen pas disa javësh dhe fillimisht ngjajnë me gripin: temperaturë, lodhje dhe dhimbje muskujsh. Në raste më të rënda mund të shfaqen vështirësi në frymëmarrje, probleme gastrointestinale dhe komplikacione serioze.
Edhe pse nuk ekziston një trajtim specifik kundër virusit, diagnostikimi i hershëm dhe kujdesi mjekësor mbeten vendimtarë për të reduktuar rrezikun. Për momentin, ekspertët insistojnë se kemi të bëjmë me një situatë që kërkon monitorim dhe kujdes, por jo frikë masive.
