Kryetari i Lumir Abdixhiku, Lumir Abdixhiku, ka dalë me një video-mesazh pas mbledhjes së Këshillit të Përgjithshëm, ku u miratua marrëveshja për garim të përbashkët me Vjosa Osmani.
Sipas marrëveshjes, Vjosa Osmani do të jetë kandidate për presidente dhe kryesuese e listës së kësaj partie, ndërsa vetë Abdixhiku do të kandidojë për postin e kryeministrit.
Në deklaratën e tij, Abdixhiku tha se bashkë me Osmanin kanë vendosur ta “kapërcejnë veten” dhe të bashkohen për t’i dhënë Kosovës një kapitull të ri bashkëpunimi dhe shprese.
Ai theksoi se prej kohësh kishte folur për këtë bashkim dhe se puna për realizimin e tij kishte qenë intensive, pasi sipas tij qytetarët kërkojnë vetëm një arsye për të besuar sërish.
“Vjosa dhe unë kemi vendosur që ta bëjmë pikërisht këtë. Të bashkohemi. T’i japim vendit një kapitull tjetër”, u shpreh ai.
Abdixhiku bëri thirrje që qytetarët t’i bashkohen kësaj gare politike, duke e cilësuar atë si një mundësi për ta nxjerrë Kosovën nga përçarja dhe lodhja politike, si dhe për ta vendosur vendin në rrugën e qetësisë, zhvillimit dhe dinjitetit shtetëror.
Në fund, ai njoftoi edhe për një tubim të përbashkët me Osmanin, duke ftuar qytetarët të marrin pjesë.
“Nesër, Vjosa dhe unë ju presim nga ora 18:00 në AMC Hall, në tubimin e madh të bashkimit. Ejani. Le ta nisim bashkë këtë rrugëtim të madh për vendin”, përfundoi Abdixhiku.
