Dy ish-ministrat e Mbrojtjes në Kinë, Wei Fenghe dhe Li Shangfu, janë dënuar me vdekje për korrupsion, në një tjetër goditje të fortë ndaj elitës ushtarake kineze në kuadër të fushatës së presidentit Xi Jinping kundër korrupsionit. Sipas agjencisë shtetërore Xinhua, të dy ish-zyrtarët morën dënim me vdekje me pezullim dyvjeçar, një formulë që në praktikën kineze zakonisht konvertohet në burgim të përjetshëm, pa mundësi lirimi me kusht.
Hetimet ndaj Li Shangfu zbuluan se ai kishte marrë “shuma të mëdha parash” në formë ryshfeti dhe kishte favorizuar emërime në ushtri për përfitime personale. Ndërkohë, Wei Fenghe akuzohet se ka përfituar para dhe sende me vlerë në këmbim të ndikimit në strukturat ushtarake dhe emërimeve në ushtri.
Spastrimi kundër korrupsionit në Kinë ka goditur veçanërisht Forcën Raketore, njësinë elitare që kontrollon arsenalin bërthamor dhe raketat konvencionale të vendit. Fushata e nisur nga Xi Jinping që prej ardhjes në pushtet në vitin 2012 është zgjeruar vazhdimisht në strukturat më të larta të ushtrisë kineze.
Më herët gjatë këtij viti, nga posti u largua edhe gjenerali Zhang Youxia, një nga figurat më të fuqishme të Ushtrisë Çlirimtare Popullore dhe i konsideruar prej kohësh aleat i afërt i Xi Jinping. Sipas Institutit Ndërkombëtar për Studime Strategjike, spastrimet e vazhdueshme për korrupsion po krijojnë boshllëqe serioze në komandën ushtarake kineze dhe mund të kenë ndikuar në gatishmërinë e forcave të armatosura të vendit.
