Edhe Papa mund të ketë probleme me shërbimin ndaj klientit. Papa Leone XIV, vetëm dy muaj pasi ishte zgjedhur në krye të Kishës Katolike, telefonoi personalisht bankën e tij në Çikago për të ndryshuar numrin e telefonit dhe adresën e regjistruar në llogarinë bankare, pasi ishte transferuar në Vatikan.
Sipas një historie të treguar nga reverendi Tom McCarthy, mik i fëmijërisë së Papës, Leone XIV u prezantua me emrin e tij civil, Robert Prevost, dhe iu përgjigj saktë të gjitha pyetjeve të sigurisë që i bëri punonjësja e bankës.
Megjithatë, punonjësja këmbënguli se ndryshimet mund të bëheshin vetëm nëse klienti paraqitej fizikisht në degën e bankës në Çikago.
“Unë nuk mund të vij në Çikago”, mësohet të ketë thënë Papa, përpara se të shtonte me humor: “Po sikur t’ju thosha se jam Papa Leone?”.
Por punonjësja, duke menduar se bëhej fjalë për një shaka apo tentativë mashtrimi, i mbylli telefonin.
Historia, e publikuar fillimisht nga New York Times, rikthen në vëmendje edhe episodet e njohura të Papa Françeskut, i cili pas zgjedhjes si Papë insistoi të paguante vetë hotelin dhe telefononte personalisht njerëzit, duke u prezantuar thjesht me fjalët: “Jam Papa”.
Sipas reverendit McCarthy, problemi i Papës Leone XIV me bankën u zgjidh më pas falë ndërhyrjes së një prifti tjetër amerikan që njihte drejtorin e bankës. Ndërsa për punonjësen që i mbylli telefonin Papës, ai komentoi me ironi: “E imagjinoni të njihesh si gruaja që i përplasi telefonin Papës?”.
