Kur anija “MV Hondius” u nis më 1 prill nga Ushuaia, qyteti më jugor në botë, gjithçka dukej si fillimi i një aventure të paharrueshme. Në bord ndodheshin 88 pasagjerë dhe 61 anëtarë ekuipazhi nga 23 vende të ndryshme, të nisur për një ekspeditë 35-ditore nga Argjentina drejt Kepit Verde, përmes disa prej ishujve më të izoluar të planetit.
Pasagjerët postonin fotografi balenash, delfinësh dhe peizazhesh polare, duke e quajtur udhëtimin “një përvojë për gjithë jetën”. Por pak më shumë se një muaj më vonë, kroçera ishte kthyer në një makth global.
Tre pasagjerë humbën jetën pas një shpërthimi të hantavirusit, një sëmundje e rrallë dhe vdekjeprurëse për të cilën nuk ekziston kurë. Kur anija mbërriti pranë Kepit Verde, autoritetet refuzuan t’i lejonin pasagjerët të zbrisnin në tokë.
Një video e publikuar nga blogeri amerikan Jake Rosmarin, ku ai shfaqej i përlotur dhe i frikësuar, u shpërnda në mbarë botën. “Nuk jemi thjesht një histori lajmesh. Jemi njerëz, me familje dhe jetë që na presin në shtëpi”, tha ai.
Ngjarja riktheu kujtimet e shpërthimeve të Covid-it në anijet turistike, kur kroçerat endetnin nga një port në tjetrin pa u lejuar të ankoroheshin. Por Organizata Botërore e Shëndetësisë këmbëngul se situata aktuale është ndryshe.
Sipas OBSH-së, hantavirusi nuk transmetohet lehtë nga njeriu te njeriu dhe rreziku për popullatën e gjerë mbetet i ulët. Megjithatë, kjo është hera e parë që regjistrohet një shpërthim i tillë në një anije turistike.
Viktima e parë ishte një 70-vjeçar holandez, i cili shfaqi simptoma respiratore më 6 prill dhe vdiq pesë ditë më vonë. Fillimisht, kapiteni i anijes tha se bëhej fjalë për “shkaqe natyrale”. Por situata ndryshoi kur bashkëshortja e tij, që kishte zbritur në ishullin Shën Helena, u sëmur dhe ndërroi jetë po ashtu.
Pak ditë më vonë, një britanik në bord u sëmur rëndë dhe u transportua me urgjencë në Afrikën e Jugut. Më pas, një grua 80-vjeçare gjermane vdiq në anije, ndërsa specialistët identifikuan hantavirusin si shkakun e infeksionit.
Ekspertët e shëndetit publik shpjegojnë se kroçerat krijojnë kushte ideale për përhapjen e sëmundjeve: ambiente të mbyllura, kontakt të afërt mes njerëzve, sisteme të përbashkëta ajri dhe uji.
Për më shumë se tre ditë, “MV Hondius” qëndroi në pritje pranë Kepit Verde pa leje për të hyrë në port. Edhe Ishujt Kanarie refuzuan fillimisht ta pranonin anijen. Pas negociatave me OBSH-në, Spanja lejoi që ajo të ankoroheshte pranë Tenerife-s, por me kushte të rrepta izolimi.
Pasagjerët pritet të evakuohen drejt vendeve të tyre me masa ekstreme sigurie. Autoritetet spanjolle thanë se ata do të transportohen në zona të izoluara, me automjete të veçanta dhe pa asnjë kontakt me publikun.
Ndërkohë, autoritetet shëndetësore po kërkojnë gjurmët e të paktën 29 personave nga 12 shtete që kishin zbritur më herët nga anija në ishullin Shën Helena. Në Britani, 23 shtetas që ndodheshin në bord mund të izolohen për 45 ditë pas kthimit në vend.
OBSH vazhdon të theksojë se “kjo nuk është fillimi i një pandemie dhe nuk është një Covid i ri”, por historia e “MV Hondius” ka rikthyer frikën globale se si një virus i panjohur mund të shndërrojë brenda pak javësh një udhëtim ëndrrash në një tragjedi ndërkombëtare.
