Sipas BBC-së, në 97 vitet e historisë së La Ligës, titulli kampion nuk është vendosur asnjëherë në një përballje direkte “El Clasico”.
Pas fitores së Real Madridit ndaj Espanyolit, është shmangur edhe një skenar i mundshëm i sikletshëm për madrilenët, që do të duhej të bënin ‘gardën e nderit’ për Barcelonën në rast se katalanasit do të hynin tashmë të shpallur kampionë në ndeshjen direkte.
Barcelona kryeson aktualisht renditjen me 11 pikë avantazh ndaj Real Madridit dhe është shumë pranë sigurimit të titullit kampion. BBC raporton gjithashtu se skuadra katalanase mund të thyejë rekordin për diferencën më të madhe të pikëve në historinë e La Ligës, i cili është 15 pikë dhe daton nga sezoni 2012–13.
Nëse Barcelona i fiton të gjitha ndeshjet e mbetura, mund të arrijë 100 pikë në sezon, duke barazuar rekordin e Real Madridit (2011–12) dhe Barcelonës (2012–13). Gjithashtu, do të vendoste një rekord të ri për numrin më të madh të fitoreve në një sezon të La Ligës, me 33 triumfe dhe vetëm një barazim deri më tani.
Nga ana tjetër, Real Madridi rrezikon ta përfundojë sezonin pa trofe për herë të dytë në dekadën e fundit, pas sezonit 2020–21.
“El Clasico” i ardhshëm mbetet një ndeshje me peshë të madhe, edhe pse Barcelona është shumë pranë kurorëzimit si kampione e Spanjës.
