Cristiano Ronaldo ka deklaruar se synimi i tij kryesor në këtë fazë të karrierës është fitimi i titullit kampion me Al Nassr FC, duke pranuar se fundi i karrierës së tij si futbollist po afrohet gjithnjë e më shumë.
Sulmuesi portugez vazhdoi formën e mirë edhe të mërkurën, duke shënuar në fitoren ndaj Al Ahli Saudi FC, rezultat që e afron skuadrën e tij edhe më shumë me trofeun e parë të kampionatit në Arabinë Saudite.
Në një intervistë të fundit për “Canal GOATBR”, Ronaldo ka folur hapur për të ardhmen e tij, duke lënë të kuptohet se momenti i tërheqjes nga futbolli profesional nuk është më larg.
“Fundi i karrierës sime po afron, dua ta shijoj secilën ndeshje,” është shprehur ai, duke theksuar se për të çdo ndeshje tashmë ka një vlerë të veçantë.
“Unë nuk po luaj vetëm për këtë gjeneratë, por edhe për të kaluarën dhe për atë që po vjen. Po e shijoj ditë pas dite, ndeshje pas ndeshje, vit pas viti. Është fakt që fundi po afrohet,” shtoi ylli portugez.
Ai theksoi gjithashtu se karriera e tij ka qenë jashtëzakonisht e suksesshme dhe se dëshiron ta mbyllë në të njëjtin nivel: “Karriera ime ka qenë brilante dhe dua ta vazhdoj në këtë mënyrë. Dua të shënoj gola dhe mbi të gjitha të fitoj. Ne vërtet duam ta fitojmë ligën.”
Ndërkohë, Ronaldo ka arritur në shifrën e 970 golave në karrierë, duke iu afruar gjithnjë e më shumë objektivit historik prej 1,000 golash në ndeshje zyrtare, një arritje që nuk është realizuar më parë nga asnjë futbollist.
