Ish-kampioni i botës në peshat e rënda, Anthony Joshua, do të rikthehet në ring më 25 korrik në Riad të Arabisë Saudite, ku do të përballet me boksierin shqiptar Kristian Prenga. Ndeshja do të shënojë rikthimin e britanikut pas një periudhe të vështirë, pasi ai u përfshi në një aksident automobilistik në dhjetor të vitit të kaluar ku humbën jetën dy miq të tij të afërt.
Përballja është pjesë e një marrëveshjeje me disa ndeshje që Joshua ka nënshkruar për të zhvilluar duele në Arabinë Saudite. Ndeshja është paralajmëruar me titullin “The Comeback” dhe do të transmetohet drejtpërdrejt në mbarë botën nga platforma DAZN.
Kristian Prenga, 35 vjeç, me origjinë shqiptare dhe rezident në SHBA, është ish-kikboksier dhe që prej vitit 2016 ka kaluar në boks profesionist, ku ka regjistruar 20 fitore dhe vetëm një humbje.
Promotori Eddie Hearn konfirmoi gjithashtu se është arritur marrëveshja për një përballje të shumëpritur mes Anthony Joshua dhe Tyson Fury më vonë gjatë këtij viti. Ai shkroi në rrjetet sociale: “E nënshkruar, e vulosur dhe e dorëzuar! AJ kundër Fury është realitet.”
Sipas Hearn, dueli me Prengën në korrik do të shërbejë si një ndeshje përgatitore për Joshua, përpara përballjes së madhe me Fury që pritet të zhvillohet në fund të vitit.
Joshua, 36 vjeç, ka një rekord prej 28 fitoresh dhe 4 humbjesh. Ndeshja e tij e fundit ishte në dhjetor, kur ai mposhti me nokaut në raundin e gjashtë amerikanin Jake Paul në Miami.
Nga ana tjetër, Tyson Fury kërkoi publikisht përballjen me Joshua pas fitores së tij ndaj rusit Arslanbek Makhmudov më 11 prill, duke e quajtur duelin mes tyre “Beteja e Britanisë” që fansat e boksit e presin prej vitesh.
