Sulmuesi i Liverpool, Mohamed Salah, do të mungojë për pjesën e mbetur të sezonit për shkak të një dëmtimi në muskujt e pasëm të kofshës, të pësuar gjatë fitores 3-1 në Premier League ndaj Crystal Palace. Lajmi është bërë i ditur nga drejtori i përfaqësueses së Egjiptit, Ibrahim Hassan.
33-vjeçari, i cili më parë ka konfirmuar se do të largohet nga kampionët në fuqi të Anglisë në fund të sezonit, u pa duke përshëndetur tifozët me duartrokitje teksa doli i dëmtuar në minutën e 60-të.
Edhe pse klubi nuk ka dalë ende me një reagim zyrtar mbi gjendjen e tij, Hassan ka theksuar se Salah nuk do të rikthehet më në fushë gjatë këtij sezoni.
“Ai ka pësuar një çarje në muskujt e pasëm të kofshës dhe do t’i duhen rreth katër javë rikuperim,” deklaroi ai për Reuters.
Pas nëntë sezonesh të suksesshme me shumë trofe, aventura e Salah te Liverpooli po i afrohet fundit. Lamtumira e tij pritet të jetë simbolike, me një mesazh për tifozët pas sfidës së fundit të sezonit ndaj Brentford FC.
Liverpooli ka ende disa ndeshje për të zhvilluar, brenda dhe jashtë fushe, përfshirë përballjet me Chelsea FC, Manchester United dhe një transfertë ndaj Aston Villa.Salah mbetet një nga golashënuesit më të mëdhenj në historinë e Liverpoolit, me 12 gola dhe 9 asistime në të gjitha garat këtë sezon.
Sipas Hassan, sulmuesi pritet të jetë i gatshëm për Kupën e Botës 2026, ku Egjipti do të përballet me Belgjikën, Zelandën e Re dhe Iranin në Grupin G. Megjithatë, Salah synon të rikuperohet plotësisht për turneun në Amerikën e Veriut dhe të shmangë përsëritjen e problemeve me lëndime si në vitin 2018, kur një dëmtim në shpatull në finalen e Champions League ndikoi në paraqitjen e tij në Botërorin e Rusisë.
