Fundi i sezonit në futbollin europian po afron dhe kjo fundjavë mund të sjellë shpalljen e disa kampionëve në ligat më të rëndësishme të kontinentit, me skenarë mjaft interesantë në garën për titull.
Në La Liga, Barcelona është pranë fitimit të titullit të 29-të kampion. Skuadra katalanase, e udhëhequr nga Pedri dhe me mungesën e Lamine Yamal për pjesën e mbetur të sezonit, do të përballet me Osasunan. Për t’u shpallur kampione këtë fundjavë, Barça duhet të fitojë dhe njëkohësisht të shpresojë që Real Madridi të mos arrijë fitore ndaj Espanyolit.
Në Serie A, Interi është vetëm një hap larg titullit, duke kryesuar me 79 pikë dhe duke lënë pas Napolin dhe Milanin. Zikaltrit presin Parman dhe një fitore do t’u siguronte matematikisht trofeun. Madje, Interi mund të shpallet kampion edhe para se të zbresë në fushë, nëse Napoli mposhtet nga Como dhe Milani nuk fiton ndaj Sassuolos.
Edhe në Turqi, Galatasaray është shumë pranë një tjetër triumfi. Me 74 pikë, shtatë më shumë se Fenerbahçe, skuadra e Stambollit mund të sigurojë titullin e katërt radhazi nëse arrin të mposhtë Samsunsporin këtë të shtunë.
Ndërkohë, në Portugali, Porto është shumë afër rikthimit te titulli kampion, duke mbajtur një avantazh prej shtatë pikësh ndaj Benficas. Porto mund të festojë edhe para ndeshjes me Alvercan, në rast se Benfica humbet ndaj Famalicaos. Nëse Benfica barazon, atëherë Portos i mjafton të mos humbasë për të vulosur titullin.
Kjo fundjavë premton emocione të forta dhe mund të sjellë disa kampionë të rinj në futbollin europian.
