Kryeministri i ardhshëm i Hungarisë, Peter Magyar, ka emëruar Marton Mellethei-Barna si ministër të Drejtësisë, një vendim që ka ngjallur kritika për shkak të lidhjes familjare mes tyre, pasi ai është vëllai i bashkëshortes së Magyarit.
Emërimi është kritikuar veçanërisht nga përfaqësues të Fidesz, partisë që ka qeverisur vendin për 16 vite dhe që pritet të kalojë në opozitë pas fitores së Magyarit në zgjedhjet e prillit.
Përballë kritikave, Magyar ka reaguar në rrjetin social X, ku ka publikuar një video duke mbrojtur vendimin e tij. Ai theksoi se ministri i ardhshëm i Drejtësisë ka një karrierë të konsoliduar brenda dhe jashtë vendit, si dhe ka qenë i përfshirë që në fillim në lëvizjen e tij politike.
“Pavarësisht lidhjes familjare, vendimi është marrë mbi bazën e meritës dhe transparencës. Ai ka kontribuar në mënyrë të rëndësishme në programin tonë politik dhe në ndryshimin e sistemit,” u shpreh Magyar.
Ai shtoi se fakti që ata janë të lidhur edhe në nivel familjar ka qenë një “dilemë e veçantë”, por ka vendosur të ecë përpara me emërimin, duke kërkuar transparencë të plotë në punën e ministrit të ri.
Gjithashtu, u bë e ditur se motra e tij, e cila ka shërbyer si gjyqtare, do të pezullohet nga sistemi gjyqësor për shkak të shqetësimeve mbi konfliktin e interesit.
Mellethei-Barna është avokat dhe bashkëpunëtor i ngushtë i Magyarit, si dhe një nga themeluesit e lëvizjes politike që më vonë u shndërrua në strukturë partiake. Ai ka mbajtur role të rëndësishme juridike brenda ekipit të tij politik.
