Një rezervist izraelit qëlloi për vdekje 14-vjeçarin Aws al-Naasan jashtë portës perëndimore të shkollës së mesme për djem në Mughayyir, ku ai studionte në klasën e nëntë. Djali u rrëzua menjëherë, ndërsa shokët e tij, mes të shtënave, e tërhoqën trupin drejt sigurisë, duke lënë pas një gjurmë gjaku përgjatë murit të shkollës.
Pamjet nga brenda ndërtesës tregojnë fëmijë dhe mësues të tmerruar të strukur në shkallë, duke bërtitur që të tjerët të futeshin brenda. Në një tjetër video shihet autori, i veshur pjesërisht me uniformë ushtarake, duke marrë shënjestër nga një kodër përballë shkollës.
Pak minuta më vonë, i njëjti person vrau edhe vëllain e një mësuesi të anglishtes që jetonte pranë shkollës. Jihad Abu Naim, 36 vjeç, la pas një bashkëshorte shtatzënë që priste fëmijën e tyre të parë.
Ngjarja e 21 prillit është pjesë e një vale dhune në rritje nga kolonët izraelitë në Bregun Perëndimor të pushtuar, ku gjithnjë e më shpesh në shënjestër janë shkollat dhe nxënësit. Në fshatin Mughayyir, me rreth 3,000 banorë, sulmet kanë qenë të vazhdueshme prej vitesh. Edhe babai i Aws ishte vrarë në vitin 2019, ndërsa përpiqej të ndihmonte një fqinj të plagosur.
Pas vrasjeve, mësimi u pezullua për një javë, ndërsa familjet përballen me dilema mes edukimit dhe sigurisë së fëmijëve. “Duam të kthehemi në shkollë, por familjet tona kanë frikë”, thotë një nga shokët e klasës së Aws.
Sulmet ndaj arsimit nuk janë raste të izoluara. Sipas UNICEF, në Gaza mbi 600 mijë fëmijë janë drejt përfundimit të vitit të tretë pa arsim të rregullt, ndërsa mijëra nxënës dhe qindra mësues janë vrarë dhe shumica e shkollave janë dëmtuar ose shkatërruar.
Edhe në Bregun Perëndimor situata po përkeqësohet. Vetëm disa orë pas vrasjes së Aws, kolonët shkatërruan një shkollë të financuar nga Britania dhe vendet europiane. Në zona të tjera, rrugët drejt shkollave janë bllokuar, ndërsa protestat e banorëve janë shpërndarë me gaz lotsjellës.
Organizatat për të drejtat e njeriut flasin për një model të përsëritur dhune dhe presioni ndaj komuniteteve palestineze, me qëllim zhvendosjen e tyre. Ushtria izraelite ka deklaruar se i dyshuari qëlloi pasi makina e tij u godit me gurë, por pamjet tregojnë se ai ndodhej qindra metra larg rrugës kur hapi zjarr.
Në një realitet ku frika ka hyrë në oborret e shkollave, edhe një thirrje e thjeshtë si “Hyni brenda” bëhet kufiri i fundit mes jetës dhe vdekjes.
