Prokuroritë përplasen për dosjen e Enton Janushit. Pasi përmes analizës së ADN-së u konfirmua pas 11 vitesh se ehstrat e gjetura në fshatin Babje të Librazhdit, i përkisnin shtetasit Enton Janushi, prokuroria e Elbasanit e përcolli dosjen në Tiranë, duke argumentuar se zhdukja e tij në 2015 kishte ndodhur në kryeqytet sipas kallëzimit të familjarëve. Për këtë shkak – arsyetonte prokurori – hetimi duhet të vijohej nga prokuroria e Tiranës. Kjo e fundit, e trasferoi dosjen në Prokurorinë e Përgjithshme që të përcaktojë se kush nga dy institucionet është kompetencë për hetimin e kësaj çështje.
Enton Janushi i njohur dhe si Taulant Maze u zhduk më 19 Janar 2015 në afërsi të Liqenit të Thatë në Tiranë. Fati i tij mbeti mister deri pak javë më parë, kur prokuroria e Elbasanit konfirmoi përmes ADN-së se eshtrat e gjetura në Librazhd në 2015 i përkisnin Janushit, duke konfirmuar në këtë mënyrë vrasjen e tij.
Familja e Janushit ditët e fundit ka bërë kërkesë në Prokurori duke kërkuar zhvarrimin dhe kryerjen em ekspertë të pavarur të ADN-së, por pa dhënë shpjegime se përse e duan kryerjen e një veprimi të tillë.
Enton Janushi dyshohej se mbrëmjen e 16 janarit 2015 ishte përfshirë në vrasjen e vëllezërve Florenc dhe Glevis Tola nga Elbasani. Këta të fundit u gjetën të masakruar në një banesë në periferi të Roterdamit në Holandë. Ai dyshohet të jetë rrëmbyer dhe vrarë për motive hakmarrje për vrasjen e vëllezërve Tola.
