Shtetet e Bashkuara të Amerikës mund të përdorin për herë të parë një nga armët e tyre më të fuqishme, raketën hipersonike “Dark Eagle”, në një skenar të mundshëm kundër Iranit.
“Dark Eagle”, e njohur zyrtarisht si Long-Range Hypersonic Weapon (LRHW), është një raketë me rreze të gjatë veprimi dhe shpejtësi mbi Mach 5, që do të thotë se lëviz më shumë se pesë herë më shpejt se zëri. Ajo është e aftë të godasë objektiva në thellësi të territorit armik dhe të shmangë sistemet e mbrojtjes ajrore.
Sipas raportimeve, Komanda Qendrore e SHBA-së (CENTCOM) ka kërkuar dislokimin e këtij sistemi në Lindjen e Mesme, pasi Irani ka zhvendosur disa nga lëshuesit e raketave përtej rrezes së armëve aktuale amerikane.
Nëse miratohet, ky do të ishte përdorimi i parë operacional i “Dark Eagle” nga SHBA, pasi sistemi ende nuk është deklaruar plotësisht operacional. Raketat janë të kufizuara në numër dhe kushtojnë rreth 15 milionë dollarë për njësi.
Ky zhvillim shihet si një sinjal i fortë strategjik ndaj Iranit, por edhe ndaj rivalëve globalë si Rusia dhe Kina.
