E gjithë juria e Bienales së Venecias ka dhënë dorëheqjen vetëm nëntë ditë para nisjes së eventit prestigjioz të artit, mes tensioneve të forta lidhur me rikthimin e Rusisë për herë të parë që nga fillimi i luftës në Ukrainë.
Në një deklaratë të shkurtër, juria bëri të ditur se vendimi është në përputhje me qëndrimin e saj të mëparshëm për të mos marrë në konsideratë për çmime vendet “udhëheqësit e të cilave aktualisht akuzohen për krime kundër njerëzimit”, duke iu referuar Rusisë dhe Izraelit.
Bienalja ka qenë në qendër të polemikave prej javësh. Njoftimi për dorëheqjen erdhi një ditë pasi një delegacion nga Ministria e Kulturës e Italisë vizitoi Venecian për të mbledhur informacion mbi rihapjen e pavijonit rus, çështje që kishte shtyrë edhe vetë ministrin të shpallte bojkotin e Bienales.
Më herët gjatë muajit prill, Bashkimi Europian njoftoi tërheqjen e një granti prej 2 milionë eurosh, duke e konsideruar rikthimin e Rusisë në Bienale si “moralisht të gabuar”, pasi sipas tij Moska po përpiqet të fshijë kulturën ukrainase si pjesë e pushtimit të saj.
Në vitin 2022, pas nisjes së luftës nga Rusia kundër Ukrainës, kuratori dhe artistët e përfshirë në pavijonin rus u tërhoqën në shenjë proteste kundër Vladimir Putin dhe pushtimit rus, duke e lënë pavijonin bosh. Në vitin 2024, Rusia ia dorëzoi këtë hapësirë Bolivisë.
Nga ana tjetër, Ministria e Jashtme e Izraelit e ka cilësuar më herët vendimin për përjashtimin e vendit nga çmimet e mundshme si “një kontaminim të botës së artit”.
Juria e Bienales pritej të shpallte një sërë çmimesh gjatë ceremonisë inauguruese më 9 maj, por pas dorëheqjes së saj, ceremonia është anuluar dhe vizitorët do të kenë mundësi të votojnë vetë për pavionet e tyre të preferuara.
