Vetëm një javë e ndan skenën politike në Maqedoni nga ajo që liderët e koalicionit VLEN e cilësojnë si bashkimin më të madh të bllokut politik shqiptar në vend.
Koalicioni VLEN ka njoftuar se më 9 maj, në Ditën e Evropës, do të shndërrohet nga një aleancë e disa subjekteve në një strukturë të vetme politike, me një emër, drejtim dhe mision të përbashkët.
Sipas njoftimit, në këtë ngjarje pritet të marrin pjesë rreth 850 përfaqësues të degëve, të cilët do të konfirmojnë bashkimin e pesë subjekteve politike në një organizatë të vetme.
Nga VLEN theksohet se ky hap i jep fund, siç e quajnë ata, fragmentimit të gjatë politik mes shqiptarëve dhe hap një fazë të re me qasje të unifikuar dhe politikë të koordinuar.
Koalicioni vlerëson se përçarja e viteve të fundit është paraqitur shpesh si pluralizëm politik, ndërsa interesat personale, sipas tyre, kanë dominuar mbi interesin e përbashkët.
Zgjedhja e 9 majit nuk është rastësore, sipas VLEN, pasi Dita e Evropës simbolizon bashkimin dhe vlerat e përbashkëta, të cilat tani, sipas tyre, duhet të marrin formë konkrete politike në kampin shqiptar në vend.
Ata deklarojnë se struktura e re synon përfaqësim më të fortë të shqiptarëve, me një platformë të qartë politike dhe një zë të vetëm në institucione, duke shtuar se ky proces nuk do të pritet pozitivisht nga të gjithë, veçanërisht nga ata që, sipas tyre, kanë përfituar nga përçarjet e mëparshme.
