47 tituj zyrtarë, golashënuesi më i produktiv i të gjitha kohërave, 8 Topa të Artë dhe një listë e gjatë arritjesh të tjera. Këto janë statistikat e Lionel Messi deri më sot, në moshën 38 vjeç. Dhe ato pritet të bëhen edhe më të mëdha, pasi për momentin nuk ka lajme për daljen e tij në pension.
E jashtëzakonshmja e tij ishte e dukshme që kur ishte vetëm 16 vjeç dhe arrinte të tejkalonte në lojë edhe veteranët e Barcelonës. Ish-shoku i tij i skuadrës te klubi katalanas, Maxi Lopez, e ka rrëfyer këtë gjatë një interviste të fundit në programin argjentinas “Olga”.
“E shihja që ky djalosh ishte 16 vjeç dhe mund të përballonte 30-vjeçarët. Ai kishte një forcë dhe shpejtësi të tillë. Ne, djemtë më të mëdhenj, flisnim vazhdimisht se ai do të ndryshonte me kalimin e kohës”, ka treguar ish-futbollisti.
Ai shtoi: “Ronaldinho thoshte se ‘ky djalë është më i mirë se unë’. Po flasim për Ronaldinhon në kulmin e tij, e dini çfarë do të thotë kjo? Ishte viti kur ai fitoi Topin e Artë dhe ma thoshte këtë mua. Ata që janë në atë nivel e dallojnë menjëherë”, u shpreh Maxi Lopez.
Sipas tij, personaliteti i Messit në fushë ishte krejt ndryshe nga ai në jetën private: “Sot Messi është një burrë i rritur dhe një lider për mua. Por atëherë ishte shumë i ri, shumë i turpshëm”, shtoi ai.
