Sipas raportimeve të fundit të gazetës “SPORT”, në ambientet e Real Madrid ka lindur një klimë dyshimi pas pretendimeve se ish-trajneri dhe aktualisht figurë e klubit, Santiago Solari, mund të jetë i përfshirë në rrjedhjen e disa informacioneve të ndjeshme drejt mediave.
Situata është bërë më e tensionuar pas publikimit të detajeve mbi një ristrukturim të mundshëm në hierarkinë drejtuese të klubit, përfshirë edhe idenë e krijimit të një roli të ri si Drejtor Sportiv brenda departamentit teknik. Këto informacione të dala në publik kanë shkaktuar pakënaqësi të madhe në zyrat e klubit, duke nxitur edhe një reagim zyrtar.
Real Madrid ka mohuar kategorikisht këto raportime, duke i cilësuar si “të pavërteta”.
Brenda klubit, dyshimet thuhet se janë përqendruar te Solari, i cili aktualisht nuk ka një rol të përditshëm teknik, por shërben kryesisht si figurë përfaqësuese dhe ambasador. Kjo situatë ka shtuar pasigurinë rreth së ardhmes së tij në klub, ndërsa përflitet edhe për mundësinë e ndërprerjes së bashkëpunimit.
Në prapaskenë, vendimmarrja te Real Madridi mbetet e centralizuar te presidenti Florentino Perez dhe rrethi i tij i ngushtë drejtues, çka e bën çdo tension të brendshëm edhe më të ndjeshëm në strukturën e klubit.
