Tensionet në dhomën e zhveshjes së Real Madridit duket se kanë arritur kulmin, pasi Federico Valverde ka përfunduar në spital pas një përleshjeje të ashpër me Aurelien Tchouamenin.
Sipas raportimeve të “Marca”, incidenti mes dy futbollistëve ka qenë shumë serioz dhe ka kërkuar ndërhyrjen e disa anëtarëve të ekipit për të shmangur përshkallëzimin e situatës.
Burime pranë klubit bëjnë të ditur se gjithçka nisi në mëngjes, kur Valverde refuzoi t’i jepte dorën Tchouamenit, duke krijuar një atmosferë të tensionuar mes tyre. Konflikti më pas degradoi në përleshje fizike, ku uruguaiani thuhet se mori një goditje të fortë dhe u dërgua në spital për trajtim.
Problemet në kampin madrilen nuk mbarojnë me kaq. Raporte të publikuara më herët gjatë së enjtes pretendojnë se deri në gjashtë lojtarë të Real Madridit nuk komunikojnë më me Alvaro Arbeloan.
Ndërkohë, polemikat që lidhen me Kylian Mbappen vazhdojnë të shtojnë tensionin, teksa miliona tifozë kanë firmosur një peticion me thirrjen “Mbappe Out”.
E gjithë kjo situatë vjen në një moment delikat për Real Madridin, vetëm pak ditë para përballjes së madhe ndaj Barcelonës të dielën. Kriza e brendshme po shton presionin mbi presidentin Florentino Perez, i cili pritet të marrë vendime të rëndësishme gjatë merkatos së verës.
