Dalin detaje të reja nga hetimet që kanë tronditur botën e futbollit italian, të lidhura me një skandal eskortash dhe një agjenci eventesh në Milano, siç raporton e përditshmja ‘La Repubblica’.
Në qendër të hetimeve ndodhet një agjenci organizimi eventesh në Milano, administratorët e së cilës janë vendosur në arrest shtëpie, të akuzuar për shfrytëzim dhe favorizim të prostitucionit, si dhe bashkëpunim në krim.
Sipas Prokurorisë së Milanos, të paktën 70 futbollistë profesionistë dyshohet se kanë marrë pjesë në mbrëmjet e organizuara nga kjo strukturë. Në raportimet e ‘La Repubblica’, përshkruhen ambiente prive luksoze, ku konsumoheshin shishe vere që arrinin deri në 20 mijë euro.
Megjithatë, deri tani asnjë nga futbollistët nuk është zyrtarisht nën hetim.
Mbrëmjet, sipas dosjes hetimore, ofronin paketa që përfshinin klube nate luksoze në Milano, shërbime eskorte dhe në disa raste edhe substanca narkotike. Hetimet kanë zbuluar se aktiviteti dyshohet se ka vijuar edhe gjatë periudhës së pandemisë.
Rasti ka nisur pas një denoncimi të bërë nga një prej vajzave të përfshira, e cila është identifikuar në verën e vitit 2024.
Në dosje përmenden gjithashtu përgjime mes bashkëpunëtorëve të agjencisë, ku flitet për pagesa të lidhura me disa futbollistë nga ekipe si Torino, Sassuolo dhe Verona. Sipas hetimeve, shumat e kërkuara nuk përputheshin me konsumin e deklaruar, duke ngritur dyshime për pagesa të maskuara.
Avokati i të pandehurve ka depozituar dokumente në gjykatë duke kundërshtuar akuzat, duke pretenduar se pagesat lidhen vetëm me shërbime të jetës së natës dhe jo me aktivitet të paligjshëm.
