Një shpërthim i fuqishëm në rafinerinë “Motor Oil”, në zonën Agioi Theodoroi të Greqisë, ka shkaktuar vdekjen e një punëtori shqiptar dhe plagosjen rëndë të një bashkatdhetari të tij. Viktima është identifikuar si Robert Cakaj, 43 vjeç, ndërsa i plagosuri është Dorian Hysa, 50 vjeç, i cili ndodhet në gjendje kritike në spital.
Ngjarja e rëndë ndodhi pak pas orës 11:00, gjatë punimeve të mirëmbajtjes në ambientet e rafinerisë. Nga shpërthimi mbetën të plagosur disa punëtorë, dy prej të cilëve pësuan dëmtime të rënda.
Menjëherë pas incidentit, në vendngjarje u aktivizuan ekipet e emergjencës dhe të plagosurve iu dha ndihma e parë.
Fillimisht, dy punëtorët e plagosur rëndë u transportuan në Spitalin e Korinthit. Në të njëjtin spital u paraqit edhe një person i tretë, i cili kishte shfaqur probleme të lehta me frymëmarrjen si pasojë e incidentit.
Për shkak të gjendjes së rëndë shëndetësore, Robert Cakaj dhe Dorian Hysa u transferuan më pas në spitalin Thriasio, për trajtim më të specializuar. Pavarësisht përpjekjeve të mjekëve, 43-vjeçari Robert Cakaj nuk arriti t’u mbijetonte plagëve dhe ndërroi jetë disa orë pas shpërthimit.
Ndërkohë, 50-vjeçari Dorian Hysa vazhdon të trajtohet në gjendje kritike. Ai ndodhet i intubuar, pasi ka pësuar dëmtime të rënda në kokë.
Pas ngjarjes, kompania “Motor Oil” reagoi përmes një deklarate zyrtare, duke konfirmuar incidentin dhe plagosjen e rëndë të dy punëtorëve.
“Sot, në orën 11:00, gjatë punimeve të mirëmbajtjes së gjerë parandaluese në rafinerinë tonë, dy punëtorë u plagosën rëndë. Atyre iu dha menjëherë ndihma e parë e nevojshme dhe u transportuan në spital. Gjendja e tyre është e rëndë dhe po marrin kujdesin e duhur mjekësor. Që në momentet e para u aktivizuan të gjitha protokollet e kërkuara të sigurisë dhe reagimit ndaj emergjencave”, thuhej në deklaratën fillestare të kompanisë.
Megjithatë, disa orë pas këtij njoftimi, u konfirmua vdekja e njërit prej punëtorëve të plagosur rëndë.
Ndërkohë, autoritetet greke kanë nisur hetimet për të përcaktuar shkaqet e shpërthimit dhe për të verifikuar nëse janë respektuar të gjitha masat e sigurisë gjatë kryerjes së punimeve në rafineri.
Sipas informacioneve të raportuara, prokurori ka kërkuar arrestimin e kontraktorit përgjegjës për punimet, në kuadër të hetimeve për rrethanat e aksidentit.
