Kryeministri Edi Rama nuk i ndahet idesë për krijimin e shtetit Bektashi në Shqipëri. Në një intervistë për dokumentarin të gazetarit britanik Robert Hackma, Rama konfirmoi se mikroshteti bektashi që ai shpalli në Kombet e Bashkuara do të ngrihet në territorin ku ndodhet aktualisht Kryegjyshata Botërore Bektashiane, në Tiranë.
“Është vetëm një sipërfaqe e vogël toke, pak hektarë, që ata tashmë e zotërojnë dhe ku kanë qendrën e tyre. Por për Shqipërinë është një pjesë shumë e çmuar e trashëgimisë kombëtare, ndërsa për komunitetin është një garanci që ai do të vazhdojë të ekzistojë pa u zhdukur,” – u shpreh Rama.
Rama shpjegon se kjo nismë nuk është thjesht simbolike, por një mënyrë për të mbrojtur dhe ruajtur një nga thesaret më të çmuara shpirtërore të Shqipërisë.
Kujtojmë se kundër kësaj ideje është shprehur Turqia. Para disa ditësh, me një kërkesë zyrtare shteti turk ka kërkuar nga Shqipëria të mos avancojë me idenë e krijimit të një shteti bektashi.
